الحقيقة أنا مش مهتم أن رمضان جاي. لكن مهموم، طبعا. نصف الأيام الأربعة الأخيرة من فترة وجودي في القاهرة ضايعة، أقصد لياليها. لأنني سأكون على الأرجح مدعوا هنا أو هناك. وبالنهار سأكون نائما، لإني إنسان. هناك دعوتان مؤكدتان حتى الآن، أول وثالث أيام رمضان.
لم يبق لي إذن غير
بكرة، ودا تطعيم أدهم، ومن المتوقع أن يظل ليومين في حالة متقلبة نتيجة للإبر، تستدعي تواجدي أنا وأمه بجواره. حقه طبعا.
اللعب إذن على يومي التلات والأربع. والخميس إذا المفتي استذوق وأجل رمضان يوم. يا ترى ينفع أقابل أصحابي اللي ماقدرتش أقابلهم: محمود الصواف و مسعود شومان وحسان دهشان وابراهيم فخر وجمال العوضي اللي اتجوز أول امبارح وماحضرتش فرحه وحاتم عبد الهادي، يا ترى هاقدر أقابل طارق ومحمود مرة كمان؟ وتامر وهاني، ونيبو، ونائل، وطارق، وأدهم، وطاهر؟ هاينفع أعدي ع الهيئة أقابل مدحت اللي ماشفتوش وعز اللي شفته طياري وصفيّ وسيد؟ هاينفع اروح لأبويا وأمي واللا هما اللي هييجوا؟ ولو هما هييجوا، رشا ـ أختي ـ هتيجي معاهم واللا امبارح هيبقى آخر مرة أشوفها فيها؟ هينفع أروح منفذ المجلس الأعلى وأطلع أقعد ع الكافيتريا أشرب قهوة وأقلب في الكتب اللي اشتريتها وأنا فرحان؟ يا ترى هينفع أروح دار الهلال أشتري "الحب في زمن العولمة" لزميلتي في الجريدة؟ والشنطة اللي السكرتيرة الهندية محلفاني بالبقرة المقدسة لأجيبهالها؟ هاينفع أروح بنها أهدي "وجه أمريكا" لدكتورة عواطف واللا اللي اتأجل السنة اللي فاتت هيتأجل السنة دي كمان؟ وعدد أخبار الأدب عن القصة العمانية اللي كان لازم أشتري منه على قد ما أقدر واللي سهى ذكي وصفت لي ألاقيه فين؟
على الأرجح يا أستاذ أحمد، هتكون مطالب يومي التلات والأربع بتنظيف البيت وتكييسه قبل مغادرته، والحقيقة دا منطقي، لأن مش معقول واحنا صايمين وتعبانين نقعد نلف ف سجاجيد ونشم ف نفتالين ونرش بدرة الصراصير والنمل والعفاريت اللهم احفظنا، ونلبس الكراسي اكياس بردو بيدخلها التراب بعد كده.
عموما. أكيد هيبقى فيه حاجات حلوة. على الأقل واحنا بننضف هنبقى بنسمع إذاعة الأغاني، وممكن تذيع حاجة لليلى مراد ووراها على طول حاجتين واحدة لشادية والتانية لفايزة. وممكن ساعة لعبد الوهاب. وممكن رشا تيجي معاهم. وممكن طول السنة الجاية ما اقابلش أي حد من اصحابي ع المسنجر لأن المسنجر غلط والبلوجات غلط واللعب في الحاضر لصالح المستقبل حمورية وجحوشية. يا ترى دا معناه ان النوع دا من اللعب غلط؟
