Tuesday, December 26, 2006

لحس العتب

ما معنى أن أقرأ رواية اسمها لحس العتب لخيري شلبي؟ الرواية منشورة إلكترونيا على موقع هيئة الكتاب، فهل تنزيلي للرواية كان من باب الاسترخاص؟ في الغالب سعرها لن يزيد عن اتنين جنيه بأي حال، خصوصا انها نازلة في مكتبة الأسرة. إّذن الاسترخاص مش وارد لكن يمكن يكون منطق أبو بلاش كتر منه، وهو منطق في رأيي يختلف عن منطق الاسترخاص، وإن كنت مش عارف إيه هي أوجه الاختلاف أم بسبب أنني بعيد عن الوطن؟ أنا بالمناسبة لو كنت في سلطنة عمان من قرنين تقريبا كنت هابقى جار رامبو. يعني أنا قريب جدا من الوطن، باعتبار ان الوطن هو المكان اللي تحب تموت فيه، مش اللي تحب تعيش فيه، ولا اللي اتولدت فيه، وبما اني قريب من وطن رامبو، يبقى ممكن أكتفي بقراءة سيرة حياة رامبو مرة تانية بدلا من قراءة خيري شلبي هل أمر بخلل ما هو الذي يجعلني أقرأ خيري شلبي؟ مش عارف بس جايز جدا. مؤخرا حلمت اني ماسك في إيدي بطاقة جواز. ما تسألونيش يعني إيه بطاقة جواز، لأني في الحلم ما سألتش السؤال دا، اعتبرته شيء يعرفه كل الناس في عالم الحلم، الغريب في البطاقة دي ان كان مكتوب فيها بالإنجليزي إحم إحم تاريخ انتهاء الصلاحية، بس الخانة كانت فاضية طبعا اعتبرت دا من ضمن الأحلام العبثية اللي باحلم بيها في الفترة الأخيرة من كم يوم حلمت أن التليفزيون بيذيع تكذيب خبر مقتل إسماعيل هنية، والصورة اللي كانت في خلفية المذيعة كانت صورة أبو مازن بعدها حلمت ببشار الأسد بس كان أقصر بكتير من الواقع وكان لابس بدلة جنرال مليانة نياشين وكان واقف هو وجنرال إسرائيلي على هضبة مطلة على مدينة مدمرة ومليانة أسلحة ودبابات وكان بشار بيقول للجنرال الإسرائيلي شايف عمايلك يا كلب، بس بيقولها بهزار، وبعدين قال له، تعال بقى اما أسلمك المدينة، وأول ما اتحركوا، قام بشار مطلع رشاش ماعرفش منين وفرغوا في جسم الجنرال الإسرائيلي، كتصرف انتحاري مش ممكن يعمله بشار بس بردو دا مش معناه اني أمر بنكوص إلى مرحلة 16 سنة لما قريت رواية الشطار لخيري شلبي، قريتها كاملة فعلا، واشتريت بعد ما قريتها مذكرات عثمان أحمد عثمان إنما توصل للحس العتب؟؟ عموما أنا لسة ماقريتهاش، أنا نزلتها بس من على الموقع من أحلام الفترة الأخيرة المؤشرة وربما المرجحة لوجود خلل عقلي هو حوار مع أبويا كنا قاعدين على سطح البيت القديم، الأسرة كلها، بس ما كناش بناكل فول سوداني، وكنت أنا باتكلم عن أوليات أي مصري محترم، كنت باتكلم عن الحاجاتت اللي ينبغي لأي مصري انه يتابعها فاكر اني اتكلمت عن قضية دارفور وعن قضية التعديلات الدستورية وازاي ان أي مواطن مصري محترم لازم يتابع خطاب الريس في البرلمان اللذيذ ان ابويا بص لي بصة فهمت منها انا انه بيقول لي انت مابتفهمش حاجة فرديت بعنف، أنا بقى لي خمس سنين باترجم يوميا مقالات في السياسة، يعني طبعا بافهم في السياسة بس بردو دا لا يبرر قراية لحس العتب