Saturday, May 24, 2008

vomit

من حبة كده، يعني من قيمة خمس ست دقايق، شفت ع المدعوق الفيس بوك صورة واحدة مبينة لامؤاخذة ، قصدي مبينة اللهم احفظنا، قصدي مبينة والعياذ بالله مندا منظر، صدرها. وواحد من البِنِي آدمين اللي ضفتهم بإيدي اللي تنقطع وفي رواية أخرى تنشك كاتب تعليق بيقول

You are gorgeous indeed

لسه ضايف الشخص دا من يومين بس، بمبادرة مني، على أساس انه مترجم، وبيترجم من لغة نادرة، وقلت مهم يا واد تبقى متابعه. عموما هو يا إما راجل مجامل إلى حد يصيب بالغثيان، يا إما ذوقه مريض إلى حد يثير الشفقة بدرجة تصيب بالغثيان بردو

على أي حال، الصورة ماكانتش واضحة قوي، أو انا عنيا دغششت م الهباب الكمبيوتر طول اليوم، قوم الشيطان (ووفقا لعلم النفس الحديث هناك الأنا والهو والشيطان) لعب ف راسي ورحت أبص على ألبومها. لاقيت بعيد عن السامعين بتاع تلاتاشر صورة، إيشي تاتو على البطن اللي هي بيلي بالإنجليزي، وإيشي حلقان في المنخير، ومناظر بقى أستغفر الله العظيم، مش عايزين نجيب في سيرة حد، احنا عندنا كلاب ف شارعنا. عموما أنا اللي رحت برجلي، ماحدش زقني قوي يعني. بس بيني وبينكم صعب عليا كمبيوتر غلبان غلب الدنيا والآخرة، زنقاه البعيدة يا ولداه بجسمها في الحيطة مش عارف يفلفص

ودي من أهم فوايد الكمبيوتر والإنترنت والبلوجينج، إن اللي كنا بنطرشه زمان وخلاص، دلوقت بنكتبه وخلاص بردو