قضيت
الأربعاء والخميس في ترجمة فصل من كتاب عن مبارك والتعليم. نحتاية كما يقال. بس
المهم اني وانا باترجم بكل آلية، وصوابعي بتتحرك على الكيبورد، كنت سرحان في مراحل
التعليم اللي مريت بيها. الكلام اللي كنت باترجمه
كان مليان جداول عن أعداد التلاميذ اللي بيلتحقوا بمراحل التعليم المختلفة من سنة
91 لـ 2000. طبعا دلوقت بالاحظ اني كنت من التلاميذ دول، جزء من الأرقام، والنسب
المئوية، واني شاهد على كدب كل اللي بيتقال عن تزويد المدارس بالكمبيوترز والوسائل
التكنولوجية الجديدة. بس أثناء الشغل فعلا، كنت
سرحان في الـ 12 سنة تعليم قبل الجامعة. افتكرت زيارة لمدرستنا من مدرسة ثانوية
كانت مدرسة بنين بس، ومسابقة المعلومات العامة اللي تمت بينا وبين المدرسة دي كان
فيهم واحد نسيت ملامحه تماما، وأكيد نسيت اسمه، بس فضلت فاكر انه سأل سؤال كوميدي،
بيت شعر قراه نجيب الريحاني في فيلم بطريقة ملغزة: إذا لم تكن لي والزمان شُرُم
بُرُم فلا كنت لي والزمان تراللي، وطلب من حد فينا يقول البيت الصحيح. فجأة كل
طلبة مدرستنا التفتوا ناحيتي، وأنا احمريت، واتكسفت وحالتي بقت بالبلا
